Collectivité Territoriale de Corse

Cummemurazione di u 210u anniversariu di a morte di P. Paoli 07/02/2017 - Discorsu di u Presidente di l'Assemblea di Corsica, Jean-Guy Talamoni

Mercredi 8 Février 2017




Caru Presidente di u Cunsigliu Esecutivu,
Cari eletti,
Cari tutti,

St’omagiu à Pasquale Paoli si presenta in circustanze particulare quist’annu : 210 anni fà, si n’andava u Babbu di a patria. Diventava – per ripiglià e so parolle – un « citadinu di u celu ». Ma diventavanu dinù, ellu è u so guvernu, un mitu chì i seculi ùn anu sgassatu. Dipoi un annu, i nostri cumpatriotti anu sceltu di cunfidà l’affari publichi à u primu guvernu corsu dipoi Pasquale Paoli. Què, dà à sta cumemurazione una dimensione nova.
Sicuramente, hà cambiatu assai a Corsica dipoi u XVIIIu seculu, è ùn si tratta micca quì di circà à vultà in daretu, chì a sucetà corsa di tandu ùn era megliu chè quella d’avà. Ùn credimu mancu à pena à u mitu di a dicadenza. Quessu, u mitu, hè vechju quant’è l’umanità, ma hè falsu è più chè falzu : à l’epica di Paoli digià, certi Corsi ripetianu dipoi seculi è seculi « Corsica ùn averai mai bè ». Ma à tempu, d’altri Corsi, impegnati in lu cunflittu contru à i Genuvesi, pensavanu elli chì a Corsica era prutetta da a pruvidenza è scrivianu à i so amichi : « Campate felici ! »

È noi simu in listessu spiritu. Simu di quelli chì volenu fà chì a stonda presente è quelle di dumane sianu sempre più belle è più felice. Per indettu, quandu no vidimu i nostri giovani, à l’università, ci dimu chì quelli di l’Università di Paoli ùn eranu sicuramente ne più struiti ne più astuti. Ma eranu i primi.
Di issu duminiu educativu, quistione oghje più presente chè mai, Paoli n’hà fattu una priorità è nantu à issu puntu, hà insignatu a strada à e nostre istituzione d’oghje, è in particulare à a nostra magiurità. Ancu s’è l’educazione ùn si pò cuncipisce avà cum’è à l’epica.

Ci hà insegnatu Paoli a strada per d’altri sugetti attuali di primura : a laicità, a tuleranza religiosa, a spiccanza trà i puderi, urganizata da un republicanisimu uriginale. Senza parlà di u dirittu di i populi à decide di u so destinu : l’autodeterminazione. Ramintate vi e prime parolle di a Custituzione di u 1755 : « A Dieta generale di u populu corsu, legitimamente maestru d’ellu stessu ». Ci hè vulsutu à aspettà centu cinquant’anni dopu à Paoli per chì stu principiu sia adimessu, in teuria, da a cumunità internaziunale. È disgraziatamente ùn simu ancu passati da a gramatica à a pratica chì, oghje chì ghjè oghje i populi sottumessi à una duminazione straniera ùn mancanu micca in lu mondu... Vidite cum’ella hè attuale l’opera di Pasquale Paoli.
St’opera hè per noi una surgente viva chì ci pò inspirà è da ci una parte di e nostre urientazione. L’altra parte vene da a nostra epica è di e risorse umane d’avà. Perchè Paoli ùn pudia privede tutte l’evoluzione à vene. Per indettu, u Generale ùn cunsiderava micca u corsu cum’è una lingua chì per ellu – l’hà scritta in lu so tistamentu –, a lingua di a nazione era u talianu. Ma à u XVIIIu seculu, a cunscenza linguistica di i populi duminati ùn era ancu stata spertuta. Per què, in Corsica cum’è in Irlanda o in d’altri lochi, ci vulerà à aspettà l’effetti di u rumantisimu, à u XIXu seculu... Paoli ùn pudia esse precursore in ogni cosa, chì era un omu, è micca un Diu.

Ùn sera mancu statu un santu, Pasquale. Incù l’edizione di a so currespundenza – ci vole à salutà quì u travagliu di Antone Maria Graziani –, si cunnosce avà qualch’uni di i so difetti, chì lighjendu e so lettere u pudemu seguità passu à passu, è guasi entre in lu so cerbellu... Ognunu sà oramai ch’ellu li piacia a cicculata, chì u prufessore Geniu Gherardi vene di publicà ne a prova, nantu à Twitter : una cumanda in Tuscana firmata da u Generale ellu stessu, chì era ùn affare impurtante... Què ùn era un difettu, di manghjà a cicculata... Ma si trovanu dinù in li so scritti infurmazione menu legere nantu à i so calculi pulitichi cumplessi, è ancu cumplicati certe volte...
Ma ci si vede sopra tuttu l’amore di Pasquale Paoli per a so terra, per a so nazione, è ci si trova un idea centrale chè no ripigliemu oghje à contu nostru : a vulintà di cunsacrà tutte e so forze à a Corsica, è di serve, senza stancià, u bè cumunu, u bè publicu, spressione chì rivene à ogni pagina.
Micca un Diu, micca un santu : un omu.

Solu un omu, ma un umone.

Oghje, ghjè incù assai emuzione chè no li rendimu umagiu. À ringrazià vi.