Chjama à prugetti per a simana di a lingua corsa 2012

A Cullettività Territuriale di Corsica s’impegna à prò di a lingua corsa. Sustene è urganizeghja parechje manifestazione di prumuzione in direzzione di u grande publicu di manera à fà sente, vede è parlà a lingua in tutti i duminii di a vita suciale.
 
Prupone a prima « Simana di a lingua corsa » da u 4 finu à u 10 di ghjugnu.
 
E scole, i centri di furmazione, e cumune, l’istituzione publiche, l’imprese, l’associ, e squadre spurtive, tuttu ognunu ci pò participà ! Urganizate una ghjustra, una manifestazione, ghjurnate “porte aperte”, ghjochi, cunferenze, letture publiche o cuncorsi di scritti in prosa o in puesia,  mustrate a vostra azzione à prò di a lingua, opere d’arte,  filmi, musiche è canti…
 
I prugetti sottumessi seranu valutati è aiutati secondu a realizabilità di u prugettu, a presenza di i partinariati è i risultati aspettati. Seranu prisentati nant’à l’almanaccu di a simana di a lingua : http://www.corse.fr/linguacorsa.

Pudete telecaricà quì sottu u cartulare di risposta à a chjama. I prugetti sò da rimandà prima di u 30 di marzu 2012.