Dispusitivu d’accessu à a cultura per i 15-20 anni di a CTC : Pass-Cultura, l’aiutu di a CTC per e to surtite à « spesa mini » !

Sì liceanu o ai da 15 à 20 anni, in amparera, in stagiu di furmazione per maiò o à a ricerca d’un impiegu è campi in Corsica ?

A Cullettività Territuriale di Corsica lancia u dispusitivu regiunale Pass Cultura è apre e porte à a cultura !

U carnettu di scecchi Pass Cultura hè gratisi è ti permette di benefizià di gratuità o di reduzzione per tutte e surtite culturale nantu à l’inseme di a regione.

D’un prezzu di 55 €, u Pass Cultura ti dà dirittu à entrade di rigalu è a reduzzione apressu à partenarii culturali numerosi spezialmente scelti per tè. 

U  Pass-cultura hè :

• 1 entrata di rigalu per una piazza di sinemà, 
• dui scecchi da permette di benenefizià di una reduzzione di 10 € nantu à una piazza di spetaculu vivu in u locu di diffusione o durente un festivale,
• dui scecchi di reduzzione di 5 € per a comprita di libri o di BD,
• un’entrata di rigalu per un Museu, un locu patrimuniale o una mediateca, 
• una reduzzione di 15 €  per a scrizzione à una pratica artistica.

Cummanda, à u più prestu u to Pass Cultura in telecarghendu u bonu di cummanda nantu à u situ www.passcultura.corse.fr, o in pigliendu lu in u to stabilimentu (liceu, centru d’amparera, missione lucala, ANPE o Permanenza d’Accolta, d’Infurmazione è d’Orientazione PAIO).

Per più d’infurmazione cuntatti u numeru verte : 0800 001 004 

Da deliberazione in data di u 30 di marzu di u 2007, l’Assemblea di Corsica hà aduttatu u dispusitivu « chèque culture » è hà decisu ch’ellu s’appiecheria à tutti i liceani è i giovani da 15 à 20 anni esciuti di u sistema sculare e senza impieghi (amparenti,stagiarii di furmazione per i maiò, giovani scritti in i stabilimenti di furmazione spezializata, dumandadori d’impiegu…) è chì puderia esse stesu, à partesi di a terza annata, à i studianti di menu di 25 anni.

D’un prezzu di 55 €, stu Pass Cultura hè rimessu à ogni interessatu chì ne face a dumanda è dà accessu à manifestazione chì cuncernanu u spetaculu vivu, u sinemà, a lettura, i musei è i siti patrimuniali, e mediateche cum’è à e pratiche artistiche.

A messa in opera veramente effettiva di stu dispusitivu s’hè fatta à tempu à a rientrata di settembre di u 2008/2009. A previsione di distribuzione di carnetti di scecchi per u prima annu di messa in opera era di 8 à 10 % di i giovani è 12 % di i giovani ne anu fattu a dumanda. 

Contu tenutu di stu prima bilanciu, a Cullettività  hà decisu di stende , in u 2011, u dispusitivu à tutti i giovani di menu di 25 anni cù principalmente i studianti è i « post bac » è di cresce u valore di u carnettu di scecchi chì passa cusì da 55 € à 75 € affinchè di permette à tutti i giovani d’avè accessu à tutta l’ufferta culturale pruposta in Corsica.

A previsione per u 2011 hè di ghjunghje à 20 è 30 % di i giovani eleghjevule. Sò 80 000 € da esse previsti per st’operazione.