Direzzione di a lingua corsa









Inchiesta sociolinguistica nant'à a lingua corsa

U Cunsigliere esecutivu in carica di a lingua corsa hà presentatu u 9 d'aprile di u 2013 a prima "Inchiesta sociolinguistica nant'à a lingua corsa: cumpetenze, usi è ripresentazione". Pudete telecaricà i risultati è l'analisi di l'inchiesta in u ducumentu in appicciu.



Pierre Ghionga, Cunsigliere esecutivu in carica di a lingua corsa
Pierre Ghionga, Cunsigliere esecutivu in carica di a lingua corsa
Stu sundame realizatu di nuvembre di u 2012 si scrive in u quadru di u fogliu di strada 2011-2015 prisentatu da u Cunsiglieru Esecutivu incaricatu di a lingua corsa Petru Ghionga.
Da valutà e pulitiche publiche messe in opera da a CTC è u Statu à prò  di a lingua corsa, a CTC ghjoca u rolu  d’usservatoriu di a lingua corsa. Si tratta di realizà à tempu inchieste setturiale à nant’à una categuria di a populazione, in un mumentu precisu o un territoriu particulare è un studiu quinquennale, più generale, cum’è quessu.
U scopu hè di cunnosce à tempu l’attitudine di l’isulani di pettu à a lingua corsa, ma dinù e cumpetenze linguistiche soie è forse dinù e pratiche soie. L’inchiesta sendu basata à nant’à u dichjarativu, u scartu trà a spressione di a brama d’usu è l’usu da veru pò esse significativu. Tocca in ritornu à a stituzione di sviluppà altre inchieste da misurà lu è da spiecà lu.
L’inchiesta si scrive in un cuntestu riccu assai in quant’à a pulitica linguistica. U Cunsigliu di a lingua hè statu messu in piazza l’8 di dicembre di u 2012, e so varie cummissione sò state custituite è anu pianificatu a so azzione, a pruposta di statutu di cuufficialità per a lingua corsa serà prisentata da u Cunsigliu Esecutivu è sottumessa à u votu di i cunsiglieri  territuriali di aprile di u 2013, nanzu d’elaburà  in l’annata a prossima pianificazione Lingua 2020 chì purterà à nant’à u periodu 2014-2020.
Chì st’inchiesta possi chjarificà e scelte chì seranu fatte per a lingua corsa in i prossimi ghjorni è in i prossimi mesi.

U studiu permette di nutà unepoche di tendenze ricche in insignamenti in quantu à a vitalità di a lingua corsa:
-          Cunterebbe a Corsica trà 86800 è 130200 lucutori cursofoni, sopratuttu anziani.
-          90% di l’interrugati pensanu chì dumane ci vuleria à parlà corsu è francese
-          58% dichjaranu di capisce bè o abbastanza bè u corsu
-          Più di un quartu u parlerebbe bè (28%)
-          26% di i 18-24 anni sò capaci à sprime si à l’urale contru à 23% di i 25-34 anni 
-          62% di i parenti dichjaranu chì u figliolu hà digià seguitatu corsi di corsu
-          48% di i menu di 24 anni anu digià seguitatu un insignamentu di lingua corsa
-          93% di l’interrugati  ascoltanu a musica corsa è 50% a cantanu
-          18% di l’interrugati   mandanu SMS in lingua corsa
-          20% anu digià lettu un libru in lingua corsa
-          35% di l’attivi vulerianu seguità una furmazione in u quadru di a so attività prufessiunale
-          10% di l’isulani parlanu sempre corsu in famiglia
-          10% di l’interrugati anu rispostu à u quistiunairiu sanu sanu in lingua corsa frà quali 7% di i 18-24 anni.
-          S’è u francese hè d’usu maiuritariu, u monolinguisimu in famiglia hè minoritariu.

inchiesta_sociolinguistica_lingua_corsa_2013_ctc.pdf Inchiesta sociolinguistica lingua corsa_2013_CTC.pdf  (1.19 Mo)